عقب الإعلامي خالد الغندور، على تصريحات محمود عبدالرازق شيكابالا، نجم نادي الزمالك السابق، والتي جاءت على النحو التالي: «كنا في نهائي أفريقيا كان معانا 14 لاعب، وكان في اثنين لاعيبة دخلت عليهم لقيتهم بيشيشوا في الأوضة».

الغندور: الدنيا اتقلبت بعد تصريحات شيكابالا

وقال «الغندور» عبر صفحته الرسمية على منصة «فيس بوك»: «لما اتفرجت على حلقة شيكابالا، لقيت زمالكاوية كتير زعلانين، وأهلاوية بيتكلموا عن تصريحاته بإنه كان نفسه يأخد بطولة دوري أبطال أفريقيا، لكن مخدهاش بسبب إنهم كانوا 14 لاعب، وإنه دخل على اتنين لاعيبة لاقاهم بيشربوا شيشة، فالدنيا اتقلبت وناس كتير اتكلمت على الموضوع ده».

وأضاف نجم الزمالك السابق: «أنا عاوز أسال سؤال: هل الشيشة دي كانت معاهم هناك في جوهانسبرج، ولا هنا في مصر؟، ولو هناك هل هم خدوا عدة الشيشة معاهم بقى، من فحم ومعسل، وفي نفس الوقت لو كان في مصر هل هو دخل عليهم في الفندق يعني، وكانوا واخدين الحاجات دي في شنطة اللبس؟».

خالد الغندور: هل الشيشة سبب الخسارة؟

وتابع: «طب هل ده ممكن يكون سبب خسارة أي بطولة، وهل لاعيبة مصر منذ قبيل الأزل مش بيشربوا سجائر، مفيش حد بيشرب علبة يعني، ده طلع في نفس البرنامج بركات وسيد معوض وقعدوا يهزروا وسيد معوض قال إن بركات قاله روح هات سجائر من الكشك، فالإسماعيلية كلها فكرت إن سيد معوض بيشرب سجائر».

وأوضح خالد الغندور: «ده في لاعيبة بتشرب سجائر وشيشة من أيامي، ومن أيام جيل كابتن حسن شحاتة، ودلوقتي بنسمع أكتر من كده».